O pleno da Corporación de Rianxo aprobou esta semana, cos votos a favor do Goberno e do Partido Popular, a proposta de orzamento para o exercicio 2026 que ascende a 12.144.746,94 millóns de euros.
Trátase do orzamento máis elevado da historia de Rianxo, “o que supón un incremento de máis do 30% con respecto ás contas do ano 2024”, destacou o alcalde Julián Bustelo, engadindo que estamos ante unhas contas “que demostran a capacidade de xestión do Goberno e que prioriza aqueles eixes de actuación nos que vimos impulsando durante estes tres anos de Goberno, poñendo foco ademais en proxectos de futuro que mellorarán a vida dos rianxeiros e das rianxeiras”.
O rexedor debullou os días pasados algúns dos detalles principais das contas:
-Consígnanse 300.000€ para aprobar e aplicar a primeira RPT do Concello de Rianxo.
-Darase prioridade ao mantemento e mellora de infraestruturas municipais, dende accesos a núcleos ata zonas verdes. Prevense importantes investimentos en dotación de novos servizos que axiña serán detallados polo Executivo.
-Consolidaranse os servizos de conciliación dando continuidade ás axudas ás asociacións de nais e pais (anpas) creadas o ano pasado e incrementándose o importe para as axudas destinadas á adquisición de material escolar.
-Consolídanse tamén as axudas para fomentar a apertura de novos comercios e mantense o apoio comprometido no 2025 coa Confraría de Pescadores Virxe do Carme de Rianxo.
-Increméntase tamén o importe destinado ás axudas a clubs e entidades deportivas do municipio logo de asentar o novo modelo por concorrencia competitiva.
