ulio Alcalde Hermo (concelleiro de Educación e Cultura de Rianxo); Jacobo Sutil, director da Axencia Galega das Industrias Culturais (AGADIC); Penélope López Díaz (concelleira de Cultura do Concello de Culleredo); María Torres e Gonçalo Guerreiro cCreadores e codirectores da compañía Elefante Elegante) © Vanessa Rabade
A compañía Elefante Elegante presentou este venres 20 de marzo, no Auditorio de Rianxo, o seu novo espectáculo infantil e familiar Coralinda, que se estreará en Galicia este sábado, 21 de marzo, ás 19:00 horas no mesmo espazo.
No acto participaron a propia compañía (da man das súas persoas creadoras, María Torres e Gonçalo Guerreiro, xunto ao elenco da obra, Sofía Espiñeira e Pablo Sánchez), acompañados por Penelope López Díaz, concelleira de Cultura do Concello de Culleredo; Cristina Pardo Portos, primeira tenente de alcalde do Concello de Culleredo; Jacobo Sutil, director da Axencia Galega das Industrias Culturais (AGADIC) e Julio Alcalde Hermo, concelleiro de Educación e Cultura de Rianxo.
Durante o acto, a compañía amosou algunhas escenas da peza e compartiu as claves dunha proposta escénica que aborda a inmigración e o medo ao diferente a través do humor, a emoción e unha potente linguaxe visual.
Dirixida a público a partir dos 3 anos, Coralinda inspírase no universo dos debuxos animados para construír unha comedia xestual sen palabras, accesíbel e universal, que convida a reflexionar sobre as experiencias das persoas que se ven obrigadas a deixar o seu fogar na procura dun lugar mellor.
Sobre o espectáculo
Nun lugar cincento, vive un señor todo vestido de cincento que manipula unha serie de caixas… cincentas. Un día, chega unha muller. Ven cantando e bailando alegremente. Trae un vestido colorido e unha actitude exuberante que non deixa a ninguén indiferente. Así que ve ao señor, diríxese a el. Pero este, desconfiado ante expresividade dos xestos dela e o volume da súa música, constrúe un enorme muro que lle impide entrar. Ela tenta dicirlle que as súas intencións son pacíficas e amigábeis, pero o señor amósase indispoñíbel a comunicar coa visitante. Será que estas dúas persoas, aparentemente tan opostas serán quen de construír un lugar diferente, onde collan moitas máis cores e máis persoas?
O espectáculo aborda a temática da inmigración e do medo ao que é diferente a través dunha linguaxe xestual fundamentada na manipulación de obxectos e na interacción constante co dispositivo escénico, a obra constrúe un universo cómico e poético que transita do realismo á hipérbole da vida cotiá.
O proxecto conta coa subvención da AGADIC – Xunta de Galicia e está coproducido polo Concello de Culleredo e por Trigo Limpo Teatro Acert. Colaboran ademais o Concello de Carral e o Concello de Rianxo.
PASE GRÁFICO E ROLDA DE PRENSA
Venres 20 de marzo ás 10h00
Auditorio Municipal de Rianxo
FUNCIÓN DE ‘CORALINDA’, DE ELEFANTE ELEGANTE
Sáabado 21 de marzo ás 19h00
Auditorio Municipal de Rianxo
