Vigo converteuse na mañá deste venres 6 de marzo no punto de encontro entre comunidade científica, administración local, entidades e cidadanía coa presentación dos resultados finais do proxecto Renatur_Outes.
Baixo o título O río Tins como laboratorio de sustentabilidade, a xornada celebrouse na Facultade de Bioloxía da Universidade de Vigo e contou coa presenza institucional da Decana da Facultade, Mercedes Gallardo, e do secretario do Departamento de Bioloxía Vexetal e Ciencias do Solo, Castor Muñoz.
O proxecto, coordinado pola Fundación CEER e no que participou persoal investigador das tres universidades públicas galegas, o Concello de Outes e a Fundación Montescola, naceu co obxectivo de devolverlle ao río Tins o seu carácter natural, mellorar o bosque de ribeira e promover a biodiversidade da súa contorna.
Durante a sesión destacouse que a recuperación do río foi guiada por criterios técnicos rigorosos e acompañada dun intenso proceso de implicación social, convertendo o Tins nun exemplo transferible para outros territorios. Nesa liña, María Rodríguez, técnica da Fundación CEER e coordinadora do proxecto Renatur_Outes, destacou que “o río Tins é hoxe un exemplo de como a colaboración e a participación social poden xerar un impacto real, medible e sostible no tempo”.
Ao longo destes anos, o proxecto acadou avances significativos:
-Máis de 20.000 m2 de áreas verdes creadas ou restauradas.
-2 quilómetros de curso fluvial restaurados.
-Máis de 4 km de río limpo.
-300 m2 de illas de biodiversidade xeradas.
-Máis de 600 persoas participantes en accións de voluntariado ambiental.
Máis de 800 persoas implicadas en procesos de gobernanza e participación social.
Recuperación Ecolóxica e eliminación de invasoras
Na xornada presentáronse os avances en materia de biodiversidade e ecoloxía e analizáronse as diversas actuacións realizadas para a mellora da conectividade do leito fluvial, recuperación do bosque de ribeira e o control de especies invasoras como as distintas especies de acacia presentes (Acacia dealbata e Acacia melanoxylon), a Tradescantia fluminensis ou as plantas do xénero Crocosmia.
Estas accións permitiron reducir a presión das invasoras e favorecer a rexeneración da vexetación autóctona de ribeira.
Participación cidadá e voluntariado
Durante a sesión abordouse tamén a dimensión social do proxecto. Ao longo destes anos organizáronse numerosas xornadas de voluntariado, actividades de educación ambiental e sesións de gobernanza para implicar á propia veciñanza de Outes.
Máis de 600 persoas participaron directamente en accións de voluntariado, mentres que máis de 800 tomaron parte en procesos de gobernanza e diálogo social vinculados á transformación do río. “Esa participación foi fundamental para establecer prioridades e poder axustar as intervencións á realidade social do concello”, explicaron os responsábeis do proxecto.
Vindeira xornada
A xornada celebrada este venres 6 de marzo enmárcase nun ciclo que comezou a pasada semana na Universidade de Santiago de Compostela e que culminará o vindeiro 13 de marzo na Universidade da Coruña.
Entidades impulsoras
Coordinado pola Fundación CEER e liderado polo Concello de Outes, Renatur_Outes conta coa participación de investigadores das tres universidades públicas galegas: Universidade de Vigo, Universidade de Santiago de Compostela e Universidade da Coruña, e a Fundación Montescola, co apoio da Fundación Biodiversidad do Ministerio para la Transición Ecológica y el Reto Demográfico (MITECO) no marco do Plan de Recuperación, Transformación y Resiliencia (PRTR), financiado pola Unión Europea – NextGenerationEU.
