Coas mans nos ombreiros, semellaban unha cadea de cregos. Pastores evanxélicos e líderes relixiosos rezaron o xoves na Casa Branca -co presidente estadounidense sentado no medio- pola vitoria de Donald Trump en Irán. En plena ofensiva militar contra este país, o presidente Trump e os representantes evanxélicos oraron e pediron protección nun acto máis a prol da política que leva a cabo a Administración republicana.
A imaxe, difundida por todos os medios de comunicación, era a estampa mesma do que podería ser un acto de imploración na época medieval, cando a mediación celestial era máis que necesaria para resolver de vez calquera enfrontamento. Máis aínda nun tempo no que o deus de cada quen estaba presente en circunstancias semellantes. Neste caso, as imaxes servidas pola televisión semellaban loas ao poderoso cabaleiro Trump, aparentemente subsumido na dor dunha acción da que Estados Unidos e Israel son os únicos culpábeis.
O xornalista israelí Alon Mizrahi pouco caso fai destes rezos e manifesta a súa convicción de que Irán acadou espallar o seu dominio militar na rexión, polo que conclúe que “cando todo isto remate, Estados Unidos xamais voltará a Asia Occidental”.
Afirma Mizrahi que estamos a presenciar un feito histórico: “Irán, para sorpresa de todos, está destruíndo as bases estadounidenses de xeito tan exhaustivo , a tan grande escala e de forma tan decisiva que o mundo non está preparado para elo”.
Segundo as súas jnformacións, Irán acadou en catro días espallar o seu dominio militar na rexión. Levouse por diante as bases militares, as propiedades e o equipo máis valioso e custoso do mundo.
“As bases estadounidenses en Baréin, Kuwait, Catar e Arabia Saudita atópanse entre as instalacións militares máis grandes do mundo. A súa construción custou billóns de dólares durante varias décadas”.
Refírese o xornalista israelí ao feito de que a maior parte do gasto militar realizado durante máis de 30 anos esfumouse: radares que custan centos de millóns de dólares cada en seu, foron destruídos nun instante, hai bases militares enteiras abandonadas, incendiadas, saqueadas e destruídas.
Engade Mizrahi que Estados Unidos nunca sufriu tanta destrución en toda a súa historia, agás no caso de Pearl Harbour (que só foi un ataque). Ningún inimigo nunha guerra convencional fixo isto ás forzas militares estadounidenses, como o está a facer Irán agora mesmo. “A situación militar é tan grave, afirma o xornalista citado, que a censura bloquea case que toda a información nova sobre esta guerra”.
Os iranís levan décadas preparándose para isto.
