Peregrinos da UPA Ribeira desenvolven estes días unha intensa experiencia espiritual na cidade de Roma, combinando visitas a lugares históricos e relixiosos cun itinerario marcado pola reflexión e a convivencia.
A chegada estivo marcada polo frío, aínda que tamén pola ilusión de percorrer unha das cidades máis emblemáticas do mundo. Na primeira xornada, os participantes realizaron un percorrido entre o Coliseo e o Panteón de Roma, entrando en contacto coa historia viva da capital italiana.
Xa no segundo día, a peregrinación centrouse en dous dos principais templos do cristianismo: a Basílica de San Xoán de Letrán, considerada a catedral do Papa como bispo de Roma, e a Basílica de Santa María a Maior. Nesta última, o grupo viviu un momento especialmente emotivo ante a tumba do Papa Francisco.
Durante o percorrido, tamén fixeron parada na Scala Santa e na igrexa de San Pietro in Vincoli, onde puideron contemplar o impoñente Moisés de Miguel Anxo.
A xornada completouse cun paseo por enclaves emblemáticos como a Piazza di Spagna, a Fontana de Trevi, a Piazza Navona e o barrio do Trastevere, onde os peregrinos puideron coñecer a vida cotiá da cidade.
A peregrinación continuou coa visita a Asís, lugar clave na espiritualidade franciscana. Alí percorreron espazos vinculados a San Francisco de Asís, como a Porciúncula, San Damián, a Basílica de Santa Clara e a Basílica de San Francisco de Asís, onde repousan os restos do santo.
Ademais, achegáronse á Igrexa da Spogliazione para coñecer a figura de Carlo Acutis, exemplo de fe para as novas xeracións.
Os participantes destacan que esta viaxe vai máis alá do turismo, converténdose nun verdadeiro camiño espiritual no que se mesturan historia, cultura e fe, co obxectivo de fortalecer a vida cristiá e a experiencia comunitaria.
