Tras tres anos de traballo, investigación e colaboración o proxecto Renatur_Outes chega ao seu peche. Será este vindeiro 27 de marzo, cunha xuntanza das entidades organizadoras e das persoas participantes para compartir os resultados coa veciñanza, coñecer de preto os cambios no río Tins e seguir abrindo conversa sobre o seu futuro. A cita levarase a cabo no Auditorio da Casa da Cultura de Outes, a partir das 16.00 horas.
Programa da xornada
16.00 h — Café de benvida
16.30 h — Apertura institucional
17.00 h — Inauguración dos novos paneis divulgativos e do bosque comestible
18.30 h — Sesión de Gobernanza e resultados
19.30 h — Peche con petiscos e agasallos
O proxecto Renatur_Outes, coordinado pola Fundación CEER e no que participou persoal investigador das tres universidades públicas galegas, o Concello de Outes e a Fundación Montescola, naceu co obxectivo de devolverlle ao río Tins o seu carácter natural, mellorar o bosque de ribeira e promover a biodiversidade da súa contorna.
