A Asemblea Xeral Ordinaria da Entidade Urbanística de Conservación do Polígono da Tomada, celebrada na mañá deste 27 de marzo nas instalacións do Concello da Pobra do Caramiñal, aprobou a constitución da área empresarial como ECOXEM, unha figura de xestión pioneira na comunidade autónoma e prevista na Lei 3/2022 de Áreas Empresariais de Galicia. En palabras das persoas participantes foi “unha decisión que lle permitirá ao complexo industrial optimizar a súa xestión e defender máis eficazmente os seus intereses”.
Engadiron que as ECOXEM son entidades de dereito público sen ánimo de lucro que permiten mellorar o funcionamento, a sustentabilidade e a competitividade dos parques empresariais, ademais de facilitar o acceso a novas vías de financiamento para impulsar servizos e novos equipamentos ou asumir a xestión de determinadas infraestruturas públicas.
Durante a reunión, a Xunta Directiva presentou aos asociados o balance de xestión do último exercicio e as principais liñas de traballo para o próximo período. Entre elas, destaca a conversión do polígono en ECOXEM, unha medida que lle posibilitará participar en iniciativas conxuntas de mellora de servizos, sustentabilidade, dixitalización e eficiencia na xestión das súas infraestruturas, así como acceder a programas de formación, asesoramento técnico e proxectos colaborativos con outros parques empresariais de Galicia.
A presidenta da Entidade Urbanística de Conservación do Polígono da Tomada, Isabel Cañas, subliñou a importancia deste paso para o desenvolvemento da área empresarial. “Supón unha oportunidade para seguir avanzando na mellora do polígono, permitíndonos acceder a novas ferramentas de xestión e reforzar a nosa interlocución coas administracións”, asegurou. Neste sentido, Cañas reiterou a vontade da Xunta Directiva por continuar traballando para mellorar os servizos e a contorna empresarial do Polígono da Tomada.
