O Campionato Galego de ILCA viviu este domingo unha segunda xornada marcada pola intensidade do vento do nordeste na Ría de Arousa, permitindo a disputa de catro novas mangas que elevan a seis o total de probas completadas na competición.
A cita, organizada polo “Club Náutico Deportivo de Riveira” baixo a supervisión da Real Federación Galega de Vela, avanza así co programa practicamente ao día, incluíndo xa o descarte do peor resultado.
Aínda que a xornada comezou cunha espera en terra de preto de dúas horas debido á forza do vento nas inmediacións do club, finalmente as condicións permitiron ofrecer un gran espectáculo na auga.
En ILCA 4 masculino produciuse o único cambio no alto da clasificación. O novo líder é Alejandro Pérez, que toma o relevo de Jaime Díaz, agora segundo a dous puntos. A terceira praza pasa a ocupala Daniel Iglesias, mentres que Manuel Pérez cae á cuarta posición.
En categoría feminina de ILCA 4, Sofía Soliño consolida o seu liderado con 33 puntos, seguida por Ana Costas e Alexandra Lis.
En ILCA 6 masculino, o dominio segue sendo claro para o regatista local Bruno Iglesias, que lidera con 7 puntos tras xestionar a xornada con intelixencia para evitar riscos innecesarios. Séguenlle Miguel Rey e Ramón Rey, ambos empatados a 12 puntos.
En ILCA 6 feminino, Lucía Vaquerizo mantén o liderado con 58 puntos. A segunda posición é para Candela Asensio, mentres que Marta Cora ocupa a terceira praza.
Pola súa banda, en ILCA 7 continúa á fronte Carlos González, con 9 puntos, seguido moi de preto por Javier Isidro, a só un punto. Completa o podio provisional Roque Vello, con 16 puntos.
O campionato concluirá este luns coa disputa da última xornada e a posterior entrega de premios, prevista para as 17:30 horas, coa presenza da alcaldesa de Concello de Ribeira, María Sampedro; o presidente de Frinsa, Ramiro Carregal Rey; o presidente da Real Federación Galega de Vela, Manuel Villaverde; e o presidente do club organizador, José Luís Torres Colomer, entre outras autoridades e representantes institucionais.
