O Museo do Gravado de Artes continúa coa programación especial polo seu 25 aniversario cunha dobre cita cultural: a proxección do documental Lodeiro e a inauguración da exposición Lodeiro. Obra gráfica, dedicada ao artista galego Xosé Lodeiro.
No acto participou a alcaldesa de Ribeira e presidenta da Fundación do Museo de Artes do Gravado (FMAG), María Sampedro, quen destacou a relevancia do legado do pintor e gravador, falecido hai 30 anos. “Este pintor e gravador xa non está con nós, pero si o seu talento a través da súa ampla obra que perdurará para que poidamos coñecer a súa maneira de ver o mundo. Diso se trata a arte: reflexión e proxección dunha realidade dende diferentes perspectivas”, sinalou.
A exposición reúne preto de 90 pezas, entre as que se inclúen 11 serigrafías, arredor de 60 linogravados e xilografías, así como 16 matrices linográficas e xilográficas. A colección permite realizar un percorrido pola traxectoria dun dos nomes propios da arte galega da segunda metade do século XX.
Segundo destacou a alcaldesa, o legado artístico de Xosé Lodeiro transmite tamén as súas conviccións e compromisos sociais, visibles nunha obra que explora a relación entre figuración e abstracción, así como a tensión entre superficie e profundidade.
Na súa intervención, María Sampedro tamén puxo en valor o cuarto de século de historia do museo, subliñando que o Museo do Gravado de Artes “dende o rural, eríxese como un dos máximos referentes do gravado a nivel internacional”.
