Unha fronte fría, apenas activa, achegarase este mércores polo noroeste e vestirá de gris o ceo das Rías Baixas e de Santiago desde primeiras horas. As precipitacións serán febles e breves, concentradas sobre todo na metade norte do país. Co paso das horas, as nubes irán rompendo e deixarán espazo para algúns claros, aínda que non se descartan chuvascos soltos e ocasionais nas comarcas do interior.
As temperaturas darán un pequeno empurrón cara arriba (15 a 17 graos), especialmente nas mínimas, mentres o vento, que soprará suave do norte-noroeste, tenderá a virar a suroeste ao final da tarde, anunciando un cambio de tempo que se deixará sentir de cara aos próximos días.
O noso mar: Vento variable á mañá, do noroeste á tarde e do oeste á noite, forza 1 a 2 á mañá e á noite e 2 a 3 á tarde. Mar rizado á mañá e á noite e mar ovellado á tarde. Visibilidade regular á mañá e boa á tarde e á noite. Mar de fondo do noroeste, con ondas de 2.5 a 3.5 metros á mañá e á tarde e 3 a 4 metros á noite.
