O Concello de Padrón anunciou que emprenderá accións legais contra varios perfís de redes sociais tras unha nova onda de insultos machistas dirixidos a integrantes do goberno municipal.
Segundo denuncia o executivo local, nas últimas horas as concelleiras Laura Horta e Chus Campos foron obxecto de graves comentarios ofensivos e acusacións de carácter persoal e familiar, difundidos tanto desde perfís identificados como desde contas falsas en redes sociais.
O Goberno padronés asegura que non se trata de feitos illados, lembrando episodios anteriores nos que se cuestionou a unha edil polo seu aspecto físico ou vestimenta. Neste novo caso, denuncian que os ataques traspasan “liñas vermellas” ao afectar á vida privada e mesmo ao papel como nai dunha das concelleiras.
O alcalde, Anxo Arca, tamén tería sido vítima de insultos reiterados xunto coa súa familia. De feito, segundo indicaron fontes municipais, xa existen accións legais en marcha contra un dos presuntos autores, que deberá declarar no xulgado o vindeiro mes de xullo.
Desde o executivo local sinalan que este tipo de comportamentos resultan “inaceptables” e consideran que responden a unha estratexia de desgaste político baseada no machismo e na difusión de contidos ofensivos. Neste sentido, critican tamén a falta de condena por parte da oposición, vinculando os ataques a perfís próximos ao Partido Popular.
O Goberno de Padrón trasladou o seu apoio ás concelleiras afectadas, destacando o seu labor á fronte de diferentes áreas municipais. Entre outras cuestións, puxeron en valor iniciativas impulsadas por Laura Horta no ámbito da dixitalización e a seguridade informática, así como o papel de Chus Campos na promoción turística e na dinamización de eventos como a Feira Medieval ou as festas do Santiaguiño.
O comunicado conclúe cun chamamento ao respecto institucional e á responsabilidade política, lembrando que a crítica é lexítima, pero advertindo de que os insultos e ataques persoais “terán resposta na xustiza”.
