O Concello de Noia compartiu información sobre os problemas xerados polo temporal Nils, no mes de febreiro, no paseo marítimo de Noia, onde os refachos de vento de preto de 100 quilómetros por hora unidos ás fortes chuvias derrubaron derrubaron parte das varandas de madeira do paseo, cuxos restos caeron á ría. Dende aquela, o Concello e a Policía Local mantiveron o peche cautelar da pasarela de madeira do paseo, coa zona acordonada por motivos de seguridade.
Desde ese mesmo momento, o Concello de Noia puxo a situación en coñecemento de Portos de Galicia, administración titular desta infraestrutura, que trasladou á Administración local que estaba a tramitar a restauración da zona afectada.
Dende o Consistorio informaron que “nos últimos días a estrutura experimentou un rápido empeoramento, en boa medida relacionado cos fortes temporais vividos nas últimas semanas”, polo que hoxe a Policía Local comunicou a decisión de pechar o paso á totalidade da pasarela, xa que o seu avanzado estado de degradación pode supoñer un risco para as persoas usuarias.
Co obxectivo de avanzar na solución desta situación, este luns o Concello remite a Portos de Galicia dous informes, un informe técnico sobre o estado da pasarela e outro de seguridade, para que se poidan adoptar as medidas oportunas canto antes.
Concello e Policía piden á cidadanía que respecte o peche e as indicacións de seguridade mentres non se resolva esta incidencia.
