O Concello de Boiro recibe da Deputación da Coruña unha subvención por importe de 36.000 euros para financiar os gastos de persoal técnico de atención a museos durante o ano 2026. Esta axuda vaise destinar ao servizo prestado no Centro Arqueolóxico do Barbanza e o Pazo de Goiáns.
Segundo explicou o Concello, o obxecto desta subvención é “contribuír a sufragar os gastos derivados do persoal para a coordinación e atención a museos e centros museísticos durante o ano 2026, en particular no concello de Boiro disponse de dous centros con estas características que son o Pazo de Goiáns e o Centro Arqueolóxico do Barbanza”.
O Centro Arqueolóxico do Barbanza está cualificado como colección visitábel de contido arqueolóxico e a zona arqueolóxica de Neixón está declarada Ben de Interese Cultural (BIC).
O Pazo de Goiáns e a súa contorna conta cun gran interese patrimonial e tamén cultural por ser un espazo no que se desenvolven ao longo do ano numerosas visitas e actividades destinadas ao público xeral.
Mediante esta axuda vanse sufragar os custes do persoal que desenvolve a atención ao público e visitas guiadas nos dous centros, así como a coordinación de actividades e exposicións que se desenvolven nos espazos.
