O colectivo ARTE 4, integrado polas artistas Carmela Taboada, Carmen Sampedro, J. Jiménez e Lola Sanz, presenta unha exposición colectiva no Centro Empresarial do Tambre, en Santiago de Compostela. A mostra inaugurarase o luns 23 de marzo ás 19:00 horas e poderá visitarse ata o 9 de abril.
ARTE 4 reúne catro creadoras con traxectorias consolidadas e linguaxes propias que, desde o respecto mutuo, deciden compartir un espazo común sen renunciar á súa identidade artística. A exposición ofrece unha selección de obras que, aínda partindo de estilos e ópticas diversas, coinciden na procura de linguaxes expresivas capaces de transmitir con intensidade sensacións, atmosferas e emocións, convidando ao espectador ao diálogo e á reflexión.
Cada unha das artistas achega unha visión singular: Carmela Taboada aposta por unha pintura figurativa de carácter costumista, inspirada na memoria e na paisaxe; Carmen Sampedro combina pintura e poesía nunha linguaxe ecléctica centrada na emoción e na figura feminina; J. Jiménez explora a paisaxe e o retrato como espazos de investigación cromática e expresión emocional; mentres que Lola Sanz desenvolve unha obra en constante evolución que transita da realidade exterior á introspección, experimentando con materiais e novas formas expresivas.
A mostra poderá visitarse de luns a venres en horario de mañá e tarde, converténdose nunha oportunidade para achegarse á diversidade e riqueza da creación contemporánea destas catro artistas.
