O BNG de Ribeira emitiu un comunicado no que reclama ao Goberno municipal que “poña en marcha medidas reais para frear a peor vaga de roubos de Ribeira” que se vén producindo desde hai xa varios meses e que, segundo recordan, “está a afectar a vehículos, negocios e vivendas”, sinalou a agrupación, engadindo que “nos últimos meses sucedéronse múltiples roubos en distintos barrios e parroquias do municipio, con especial incidencia en coches estacionados na vía pública e en garaxes, así como en establecementos comerciais e mesmo en vivendas, xerando unha crecente preocupación entre a veciñanza e o tecido económico local”. O BNG lembra que estamos a falar de “centos de persoas afectadas por estes feitos delituosos que se repitan semana tras semana, provocando unha evidente sensación de inseguridade entre comerciantes e residentes”.
O BNG lembra no comunicado que en febreiro “tendeu a man co obxectivo de analizar o problema” e “coordinar medidas que permitiran atallar a situación”. Porén, os nacionalistas denuncian que “desde aquela, non se produciron avances nin se trasladou información algunha á Corporación Municipal nin á veciñanza sobre as actuacións que se están levando a cabo”.
“O Goberno municipal non está a dar explicacións pero o máis preocupante é que tampouco está adoptando medidas para facer fronte a esta situación”, sinala o portavoz do BNG e ex-alcalde de Ribeira, Luís Pérez Barral que compareceu acompañado do grupo municipal. O ex-rexedor engade que “non se nos informa sobre se hai reforzo policial ou se se está coordinando algunha actuación co resto das administracións; o silencio e a inacción do Goberno municipal son incomprensíbeis”.
O Bloque considera que “a celebración dunha Xunta de Seguridade Local só valeu para que haxa una foto máis da señora Sampedro pero non deu lugar a ningunha medida coñecida nin a ningún plan de actuación, algo que evidencia a falta de iniciativa do executivo local”.
Para os nacionalistas, o Goberno local “non pode limitarse a esperar a que a situación se resolva por si soa mentres continúan producíndose roubos que afectan xa a centos de persoas no municipio”.
No comunicado o BNG sinala que “durante a etapa de goberno nacionalista tomaron moi en serio este tema e ampliáronse os efectivos e os medios da Policía Local, completando o cadro ata acadar 27 axentes en activo e 12 auxiliares, ademais da incorporación dun novo vehículo policial, mellorando así os recursos municipais destinados á seguridade”. Apuntan tamén “que cando se produciron problemas graves de convivencia, como ocorreu no edificio ocupado das Avesadas, o goberno encabezado por Luís Pérez Barral actuou con dilixencia e conseguiu resolver unha situación problemática que había anos preocupaba á veciñanza”.
“Sabemos que é unha situación difícil, mais nós demostramos que con traballo e medidas poden resolverse boa parte dos problemas. O que Ribeira necesita é un goberno que lidere e que traballe para resolver os problemas da xente, non un goberno máis preocupado por facerse fotos e facer que fai”, afirman.
Pérez Barral propón “reforzar a presenza policial nas rúas como unha das medidas prioritarias para facer fronte á vaga de roubos”. Neste sentido, aposta por “incrementar o número de efectivos da Policía Local, impulsar patrullas a pé e establecer reforzos policiais en horario nocturno, así como outras actuacións que garantan unha presenza efectiva e visible que disuada a posíbeis delincuentes de cometer actos delituosos”.
Do mesmo xeito, considera “necesario impulsar medidas que permitan reducir o consumo de drogas e previr condutas aditivas, xa que a presenza de drogas na vila adoita levar aparellado un aumento da criminalidade”.
