O BNG de Ribeira levará ao vindeiro pleno unha proposta para incrementar a partida destinada ao benestar animal, co obxectivo de consolidar os avances acadados nos últimos anos e seguir mellorando as condicións de vida dos animais no municipio.
A iniciativa céntrase na necesidade de garantir unha campaña anual de castración das colonias felinas, considerada clave para controlar a poboación de gatos e evitar problemas derivados da súa reprodución descontrolada en distintos barrios e parroquias. Ademais, a formación nacionalista propón instar á Xunta de Galicia a incrementar as axudas neste ámbito, co fin de apoiar o labor dos concellos e das entidades colaboradoras.
A concelleira Antía Alberte destacou a importancia de dar continuidade ao traballo realizado: “é fundamental non retroceder nun ámbito tan sensible como o benestar animal. As campañas de castración son a ferramenta máis eficaz para garantir o equilibrio das colonias felinas”.
Pola súa banda, o exalcalde Luís Pérez Barral lembrou as medidas impulsadas durante o seu mandato, como campañas de esterilización, accións de concienciación, instalación de casetas ou a creación da figura das alimentadoras felinas, en colaboración con asociacións. Tamén puxo en valor a habilitación de cinco praias para mascotas, que converteron a Ribeira nun referente neste ámbito.
Desde o BNG subliñan que estas políticas responden a unha demanda social crecente e insisten na necesidade de manter unha planificación a medio e longo prazo, apostando por un modelo de concello máis respectuoso e comprometido co benestar animal.
