O Ateneo de Santiago programa para este luns, 2 de marzo, ás 19.30 horas, na súa sede da rúa do Vilar, 19, en Santiago de Compostela, a conferencia «Ramón Otero Pedrayo. Memoria de todas as cousas», dentro dos actos de conmemoración do Ano Oteriano.
A charla estará impartida por Víctor F. Freixanes, presidente de honra da Fundación Otero Pedrayo e membro da Real Academia Galega, quen abordará a figura e o legado intelectual de Ramón Otero Pedrayo, unha das personalidades máis relevantes da cultura galega do século XX.
Freixanes (Pontevedra, 1951) é escritor, editor, xornalista e profesor ad honorem do departamento de Ciencias da Comunicación da Universidade de Santiago de Compostela, onde se doutorou en Filoloxía Románica en 1998. Catedrático en excedencia de Lingua e Literatura Galega no ensino secundario, desenvolveu unha ampla traxectoria no ámbito editorial e cultural.
Foi director xeral da editorial Galaxia entre 2002 e 2016 e codirector da revista Grial. Con anterioridade, ocupou a dirección xeral de Edicións Xerais de Galicia (1988-1993), foi director xeral de edicións do Grupo Anaya e director de Alianza Editorial S.A. entre 1994 e 1998. Presidiu a Fundación Otero Pedrayo entre 2005 e 2017, da que actualmente é presidente de honra, e forma parte da Sección de Lingua, Literatura e Comunicación do Consello da Cultura Galega.
Ingresou na Real Academia Galega en 2004 e exerceu como presidente da institución entre 2017 e 2025. Ao longo da súa carreira recibiu numerosos recoñecementos literarios e xornalísticos, entre eles o Premio Blanco Amor, o Premio da Crítica Galega, o Premio Gonzalo Torrente Ballester ou o Premio Fernández Latorre de Xornalismo. En 2025 foi distinguido coa Medalla Castelao outorgada pola Xunta de Galicia.
A conferencia deste luns permitirá achegarse á dimensión literaria, ensaística e política de Otero Pedrayo, reivindicando a súa condición de referente fundamental na construción da identidade cultural galega contemporánea.
