O Concello de Noia vén de obter unha subvención de 100.000 euros da Dirección Xeral de Comercio para continuar coa recuperación e posta en valor da Praza de Abastos, un espazo clave para a economía local.
O alcalde, Fran Pérez, destacou que esta achega permitirá avanzar na mellora das instalacións e na dinamización da actividade comercial, ao tempo que se traballa na obtención do distintivo de mercado de excelencia. Neste proceso, xa se investiron 35.000 euros en actuacións que posibilitarán a apertura de novos negocios, como dúas carnicerías e unha froitería.
A nova subvención permitirá destinar arredor de 60.000 euros á mellora da parte superior do edificio, incluíndo a creación dun local de hostalería, outra froitería e a renovación dos baños, cunha achega adicional municipal duns 20.000 euros. Ademais, investiranse 40.000 euros na redacción dun proxecto integral que dea solución definitiva ás deficiencias existentes.
O alcalde subliñou que estas actuacións buscan corrixir problemas derivados de intervencións anteriores que deixaron a infraestrutura incompleta e afectaron á actividade dos praceiros. Pola súa banda, o tenente de alcalde, Manolo Seijas, puxo en valor a importancia dunha xestión eficiente para desbloquear a situación e recuperar o protagonismo da praza.
Desde o Concello destacan que este novo impulso supón un paso firme cara á revitalización da Praza de Abastos, coa intención de consolidar a actividade comercial e mellorar os servizos á cidadanía.
