A Casa da Cultura Antón Avilés de Taramancos de Noia vai celebrar este 21 de marzo, sábado, o Día da Poesía. A cita será ás 20.30 horas e consistirá “nun encontro moi especial co poeta Manuel López Rodríguez, nun acto retrospectivo onde se percorrerá a súa traxectoria e obra”.
Intervirán: Manuel López Rodríguez, poeta, Ramón Blanco, escritor, Manuel do Río, historiador e filólogo, e Chelo Martínez, concelleira de Cultura.
Manuel López Rodríguez, tamén coñecido como Manuel L. Rodrigues ou Manuel Lôpez Rodrigues, nado en Noia o 11 de febreiro 1978, é un poeta, artista e editor galego. Publicou os libros de poesía Antítese nativa (2008), Rompe (2020), Desde onde non nace (2020), Vangarda ule (2020), Nas pulsacións (2021), Para que non me esqueza (2021), Baixo terra. No ar (Xerais 2022), O cemiterio. A néboa (2022), A flor da letra (Estampa de lectura con percusión, para nenos e nenas) (2022), Neste mesmo intre (2023), Cruzeiro (2023) e 831-urb (Xerais 2024).
Gústalle definirse como outsider e camiñar polas periferias do verso.
