O vindeiro luns 9 de marzo, Muros converterase nun espazo de encontro e participación coa celebración da andaina Latexos de Igualdade: Muros en Marcha polo 8M, unha iniciativa organizada por ADISBISMUR con motivo do Día Internacional da Muller.
Segundo explica a asociación inclusiva da comarca de Muros, a proposta “nace coa vontade de que a cidadanía poida participar activamente nun acto simbólico que busca visibilizar o compromiso colectivo coa construción dunha sociedade máis xusta e respectuosa”. Así, engaden, “nun contexto no que as desigualdades e as violencias que afectan ás mulleres seguen presentes, esta actividade pretende ser tamén un espazo de reflexión e de unión da comunidade”.
A andaina partirá ás 11:30 horas do Pozo do Cachón e percorrerá o paseo marítimo ata a Praza do Concello de Muros, onde se realizará un pequeno acto de peche.
Na iniciativa participarán alumnado e profesorado do IES As Insuas, IES Fontexería e CEIP Ramón de Artaza, ademais de persoas usuarias e profesionais de ADISBISMUR. A actividade conta tamén coa colaboración do Concello de Muros e co apoio de Protección Civil, que facilitará o desenvolvemento seguro da andaina.
Desde a organización destacan que “se trata dunha actividade aberta a toda a cidadanía, polo que animan á veciñanza de Muros e arredores a sumarse a este paseo colectivo”.
Ademais, convídase ás persoas asistentes a que, se é posible, leven algún elemento de cor violeta, símbolo desta xornada reivindicativa.
No caso de que as condicións meteorolóxicas non permitan a realización da actividade, a andaina non se anulará senón que se aprazará para outra data.
