A organización xuvenil do BNG, Galiza Nova, realizou este venres 27 de marzo unha acción de denuncia publica pola instalación dun monólito en honra á monarquía española na praza do Centenario.
A organización xuvenil cualificou este acto como “unha mostra do carácter reaccionario do Partido Popular e do Partido Barbanza Independente” e “unha ofensa á identidade do pobo galego”.
Gabiás lembrou que o monumento fora inaugurado no seu día por Xoán Carlos de Borbón, a quen definiu como “corrupto e prófugo da xustiza”. Para Galiza Nova, “a pervivencia destes símbolos é incompatible cos valores democráticos actuais” e “a monarquía representa unha institución anacrónica que ninguén elixiu e que se sustenta na opresión dos pobos”.
Durante a súa intervención, o secretario xeral quixo poñer o foco na realidade social do concello, contrapoñendo o esforzo da veciñanza coa “decisión real” que conmemora o monólito:
“O progreso de Ribeira é froito do traballo das mariñeiras, do comercio, da hostalaría e da industria. Ribeira non medra por designacións reais alleas á súa realidade, senón polo esforzo constante do seu pobo. Levantar este monólito en troques de pór en valor á cidadanía di moito de en que lado están o PP e o PBBI”.
Galiza Nova aproveitou o acto para reivindicar a República Galega como “a única vía para garantir un futuro de liberdade para a mocidad”e. Segundo Gabiás, os espazos públicos deben servir para homenaxear a quen “verdadeiramente o merece” e non para perpetuar figuras que “nada teñen que ver coa nosa identidade e coa vontade do pobo”.
A xornada concluíu cunha acción simbólica de resignificación do monólito e de recoñecemento ao pobo de Ribeira, reafirmando “o compromiso da organización cunha Galiza soberana e dona do seu propio futuro”.
