A vindeira semana vai ter lugar unha xuntanza entre a Consellería de Medio Rural e as principais industrias leiteiras da comunidade autónoma galega, previa á prevista coas cadeas de distribución. O obxectivo de ambos os encontros non é outro que acadar corresponsabilidade á hora de fortalecer este sector fundamental para Galicia.
Así o anunciou a titular da consellería citada, María José Gómez, após unha reunión co sindicato Unións Agrarias (UU.AA.) para analizar as contratacións que se van facer en datas vindeiras nun contexto caracterizado pola entrada de excedentes de leite da Unión Europea a baixo prezo e unha suba dos custes de produción.
A conselleira anunciou asimesmo novas accións para supervisar a etiquetaxe do leite coa fin de detectar posíbeis incumprimentos a respecto da orixe.
Solicitarase ao Goberno central que realice tamén un seguimento exhaustivo destes contratos para facer cumprir a lei da cadea alimentaria e que, ante o conflito xerado en Oriente Medio, reduza os impostos na enerxía, gasóleo, plásticos e fertilizantes.
A cadea alimentaria galega, con forte peso na produción leiteira, enfronta a inestabilidade derivada da guerra con Irán nomeadamente a través do aumento de custes loxísticos e enerxéticos, o que presiona nos marxes das súas principais actividades, coma a gandeiría vacún e a pesca. O incremento nos prezos da enerxía e os combustibles impactan directamente nos custes do transporte e a produción leiteira, que representan o 41% da produción nacional, segundo UGAM COAG, sendo este sector vital para o PIB rural.
Poden producirse asimesmo tensións na importación de materias primas para a alimentación do gando.
O sector gandeiro galego, cunhas 5.000 explotacións leiteiras, depende da importación de cereais para forraxe, susceptibles á volatilidade dos prezos internacionais.
