O presidente da Deputación da Coruña, Valentín González Formoso, e a deputada de Plans, Cristina García, presentaron este 12 de marzo en Ribeira os investimentos do Plan Único (POS+) nos municipios do Barbanza, nun acto institucional no que estiveron acompañados pola alcaldesa de Ribeira, Mariola Sampedro. Durante o encontro analizouse o impacto deste programa provincial nos once concellos incluídos pola Deputación na comarca (Boiro, Carnota, Lousame, Mazaricos, Muros, Noia, Outes, A Pobra do Caramiñal, Porto do Son, Rianxo e Ribeira) e destacouse o papel do POS+ como principal ferramenta de financiamento municipal impulsada pola institución provincial.
Formoso explicou que o POS+2026 supón este ano unha achega de máis de 11 millóns de euros para os concellos do Barbanza, uns fondos “que permitirán mellorar infraestruturas municipais, reforzar servizos públicos e financiar programas sociais nos municipios da comarca”. O presidente provincial destacou que o Plan Único consolidouse nestes anos como “a principal ferramenta de investimento da Deputación nos concellos, xa que permite que cada municipio decida con plena autonomía o destino dos fondos provinciais segundo as súas necesidades”.
Formoso lembrou tamén “a necesidade de mellorar o financiamento municipal en Galicia” e sinalou que “só a través do Plan Único a Deputación investiu o pasado ano 138 millóns de euros nos concellos da provincia da Coruña, unha cifra que supera en 20 millóns de euros á que a Xunta de Galicia destina ao conxunto dos 313 concellos galegos a través do Fondo de Cooperación Local”. Así, reclamou á Administración autonómica “que incremente este fondo ata acadar un mínimo de 200 millóns de euros, co obxectivo de reforzar a capacidade financeira dos municipios”. E engadiu: “Estamos nun momento no que os concellos están a asumir cada vez máis custos para manter servizos básicos e isto reduce a marxe para facer novos investimentos”.
O presidente provincial destacou tamén o importante impacto que o Plan Único está a ter no Barbanza. Desde a creación do POS+ en 2017 mobilizáronse na comarca máis de 111,2 millóns de euros, que “permitiron financiar 603 obras nos once concellos, contribuíndo á mellora de infraestruturas, equipamentos e servizos públicos municipais”, dixo.
Pola súa banda, a deputada de Plans, Cristina García, subliñou que o POS+ é “a única forma na que entendemos a cooperación cos concellos”, ao apostar por un modelo baseado na autonomía municipal, na confianza nas administracións locais e nos criterios de obxectividade.
Así mesmo, expresou que todos os concellos da provincia merecen “o mesmo apoio, sexa cal sexa a súa cor política. O POS funciona con criterios obxectivos, públicos e iguais para todos”, apuntou.
A alcaldesa de Ribeira, Mariola Sampedro, destacou que a cooperación entre administracións “é fundamental”. Puxo en valor o POS como “ferramenta fundamental para executar obras coas que dar servizos á nosa veciñanza. Eses servizos básicos que van dende abastecementos e saneamentos a pavimentacións”. Ademais, salientou que este plan permita financiar gasto corrente, “un dos maiores problemas que temos os concellos para cadrar o orzamento municipal”.
Tralo encontro institucional celebrado no Concello de Ribeira, o presidente da Deputación, a deputada de Plans e a alcaldesa visitaron as obras de construción dos novos vestiarios do Campo de Fútbol de Oleiros, actualmente en execución. A Deputación inviste 151.101 euros nesta actuación, unha das 127 obras impulsadas en Ribeira con cargo ao Plan Único. Unhas actuacións que se estenden por todas as parroquias e núcleos do municipio, con investimentos destinados á mellora da rede viaria e dos servizos básicos en lugares como Aguiño, Corrubedo, Carreira, Oleiros ou Castiñeiras, entre outros.
O Plan Único permitiu tamén actuar na renovación de pavimentos e redes de abastecemento e saneamento de auga, na creación ou mellora de beirarrúas, prazas e espazos públicos e no acondicionamento de instalacións deportivas e culturais.
Investimentos do Plan Único na comarca do Barbanza
Boiro
POS+ 2026: 1.403.036,27
POS+ 2017-2026: 14.292.726,34
Número de obras: 61
Carnota
POS+ 2026: 648.467,12
POS+ 2017-2026:6.525.781,36
Número de obras 43
Lousame
POS+ 2026: 731.599,68
POS+ 2017-2026: 7.493.292,21
Número de obras: 51
Mazaricos
POS+ 2026: 1.196.641,58
POS+ 2017-2026: 11.282.289,42
Número de obras: 31
Muros
POS+ 2026: 883.509,95
POS+ 2017-2026: 8.716.109,31
Número de obras: 42
Noia
POS+ 2026: 956.926,40
POS+ 2017-2026: 9.077.467,04
Número de obras: 36
Outes
POS+ 2026: 914.754,27
POS+ 2017-2026: 8.818.417,05
Número de obras: 79
Pobra do Caramiñal (A)
POS+ 2026: 714.617,41
POS+ 2017-2026: 6.786.934,28
Número de obras: 31
Porto do Son
POS+ 2026: 1.040.785,92
POS+ 2017-2026: 10.381.123,62
Número de obras: 61
Rianxo
POS+ 2026: 907.021,04
POS+ 2017-2026: 8.970.945,61
Número de obras: 41
Ribeira
POS+ 2026: 1.689.902,62
POS+ 2017-2026: 18.932.288,62
Número de obras: 127
Total
POS+ 2026: 11.087.262,26
POS+ 2017-2026: 111.277.374,86
Número de obras: 603
