O Ateneo Valle-Inclán de Ribeira (Café Bar Plaza) vai acoller esta semana unha nova presentación literaria. Desta volta a protagonista é a escritora Elisabeth Olivera, que dará a coñecer o seu máis recente libro, As ninguén. Será este venres 13 de marzo ás 20.30 horas. Contarase coa presenza da autora e máis de Encarna Pego, vicepresidenta da Asociación Cultural Barbantia, Antonio Lijó, secretario do Ateneo Valle-Inclán. A presentación vén da man da editorial Belagua e a AC Barbantia.
Elisabeth Oliveira (Roubaix, Francia, 1971)
De nai e pai portugueses, chegou a Galicia en 1995 para namorar desta terra e non querer marchar nunca. Licenciada polas Universidades de Lille III (Letras Modernas) e a USC (Filoloxía Francesa), actualmente exerce como tradutora e profesora nun IES de Pontevedra.
En 2016 publicou o seu primeiro poemario, Poesis, un libro-CD en catro idiomas (galego, portugués, castelán, francés) con cancións tamén nesas linguas. En 2019 viu a luz o poemario Náufragas no mar e na terra (Urutau), dedicado ás mulleres.
Participou en varias antoloxías, a última delas Libres e Vivas (Galaxia, 2021) xunto a outras nove autoras galegas, así como en numerosos festivais (Kerouac, Poesía Salvaxe, Entreverbas…), recitais e intervencións (Océano mar, no Museo de Pontevedra; Verbas de muller, no Teatro Municipal; Verbas pola Paz, na Deputación de Pontevedra, etc.).
Foi finalista do premio Jovellanos ao mellor poema do mundo en 2017.
Transita na poesía e na prosa ao son das catro linguas que fala, con predominio da lingua galega.
