O Concello de Boiro colabora co Club de Remo Cabo de Cruz na celebración da VIII Bandeira de Bateis Concello de Boiro. O concelleiro de Deportes, Marcos Fajardo, participou este venres 13 de marzo na presentación da proba xunto con Luis Piñeiro, presidente do Club de Remo Cabo de Cruz, e Margarita Hermo, directora de Relacións Institucionais de JEALSA.
A proba disputarase o domingo 15 de marzo a partir das 10.30 horas no Peirao de Cabo de Cruz, na zona da Curbera, e “está prevista a participación de 100 equipos e mais de 500 rapaces que desfrutarán desta xornada de competición”, afirmou o presidente do Club.
Disputaranse bandeira masculina e feminina, nas distancias atribuídas a cada categoría. O campo de regatas será de cinco carreiros e longos de 500 metros.
A directora de Relacións Institucionais de JEALSA, Margarita Hermo, felicitou ao club polos últimos éxitos obtidos e polo traballo porque “o éxito é practicar un deporte que contribúe a promover uns valores para unha sociedade mais xusta”.
Pola súa parte o concelleiro de Deportes, Marcos Fajardo, convidou á veciñanza a “desfrutar dun día de remo e deporte” na xornada do domingo.
