O programa da Semana Santa de Rianxo, organizado unha vez máis pola Irmandade da Paixón do Cristo coa colaboración do Concello, comezou o pasado 21 de marzo, sábado, cunha misa solemne presidida por monseñor Francisco José Prieto Fernández, arcebispo de Santiago de Compostela, e cun concerto do quinteto de ventos da Escola Banda de Música de Rianxo.
Os días 25, 26 e 27 de marzo celébrase o triduo na honra da Nosa Señora das Dores (misas ás 19.00 horas os días 25 e 26, e ás 20.00 horas o día 27, con misa solemne e procesión ao rematar a liturxia).
O 29 de marzo, Domingo de Ramos, celebrarase ás 11.00 horas a tradicional Procesión de Ramos dende a Igrexa Parroquial até a Capela da Nosa Señora da Guadalupe, onde serán bendicidos os ramos para regresaren logo os fregueses á igrexa parroquial e oficiarse a Santa Misa.
O 1 de abril, Mércores Santo, haberá dous grandes actos relixiosos: ás 20.00 horas o acto de ánimas e confesións e ás 21.00 horas o Via Crucis penitencial polas rúas de Rianxo.
No 2 de abril, Xoves Santo, celebrase a Santa Misa da Cea do Señor ás 19.00 horas e ás 21.00 horas a procesión e, ao rematar o percorrido, a celebración da Hora Santa.
As actividades do Venres Santo (3 de abril) arrincarán ás 10.00 horas co Anuncio do Santo Encontro polas rúas de Rianxo, a cargo da Banda de Tambores da Irmandade da Paixón de Cristo. Ás 11 horas celebrarase o Santo Encontro na praza Castelao. Pola tarde levaranse a cabo os Santos Oficios (Adoración da Cruz e Desencravo, ás 19 e ás 20h, respectivamente) e ás 22.00 horas a Procesión do Santo Enterro.
O 4 de abril, Sábado Santo, inclúe entrada a noite (sobre as 21.00 horas) a cerimonia da Vixilia Pascual. Ao finalizar, o Cristo da Misericordia volverá como é tradición á súa capela.
A axenda rematará o Domingo de Resurrección, 5 de abril, cunha Misa de Resurrección ás 11.30 horas. Inclúe un encontro no adro da Igrexa do Santo Cristo Resucitado coa súa nai, seguido dunha procesión polo centro histórico de Rianxo e ao rematar celebrarase a Misa de Resurrección.
O programa vén da man da Irmandade da Paixón de Cristo de Rianxo en colaboración co Concello.
