Dada a alta demanda para o espectáculo A penúltima, de Carlos Blanco, que terá lugar no novo Auditorio municipal de Ribeira no 8 de maio, o Concello e a produtora Condetrespés acordan lanzar un segundo pase. Será no mesmo día, ás 22.30 horas.
Segundo lembra a Concellería de Cultura que dirixe Ana Barreiro, Carlos Blanco “é un dos humoristas máis recoñecidos da escena galega e nacional” e en A penúltima presenta un monólogo cómico de aproximadamente 70 minutos no que combina material novo e clásico, “garantindo risas e unha conexión directa co público”. O espectáculo está recomendado para maiores de 16 anos.
“A función tivo moi boa acollida e, nesta semana pasada case se esgotan a totalidade das entradas”, engadiu a concelleira. Por iso, para que ninguén quede sen a oportunidade de rir a esgalla, dende a Concellería de Cultura e a produtora “optamos por ter un segundo pase. O compromiso do Concello de Ribeira é férreo, de aí a cantidade de propostas culturais que temos non só no Auditorio Municipal, senón tamén noutros centros culturais do municipio e nas nosas súas”, en palabras da concelleira de Cultura, Ana Barreiro.
A venda das entradas para este segundo pase comeza no luns, 9 de marzo, a partir das 09.00 horas. Como xa é habitual, farase de xeito simultáneo na páxina web www.ataquilla.com e de maneira presencial na Oficina de Atención Cidadá da casa consistorial. Para aquelas persoas que opten por adquirilas nas dependencias municipais, o horario será de luns a venres, de 09.00 a 14.00 horas. O prezo sitúase nos 14 euros, máis gastos de xestión.
