A Comisión Europea confía en que Estados Unidos respecte os seus compromisos comerciais e velará porque se protexan “plenamente” os intereses da Unión Europea. Este compromiso explícito ten que ver co anuncio de Donald Trump de que vai “cortar todo o comercio con España” dada a postura do Goberno de Pedro Sánchez sobre a ofensiva militar israeloamericana contra Irán.
Cómpre lembrar que, en roda de prensa, Trump ameazou onte, martes, con impoñer un castigo comercial a España pola negativa do Goberno á utilización das bases de uso conxunto de Rota e Morón para a guerra que Estados Unidos e Israel manteñen con Irán.
O goberno español reaccionou deixando claro que a súa vontade “é e será sempre traballar polo libre comercio e a cooperación económica entre países, desde o respecto mutuo e o cumprimento da legalidade Internacional. Porque o que a cjdadanía pide e merece é máis prosperidade, non máis problemas”.
Após afondar en que “España é un membro clave da OTAN que cumple cos seus compromisos e contribúe de xeito destacado na defensa do territorio europeo”, Pedro Sánchez puxo o foco en que España é “unha potencia exportadora da UE e un socio comercial fiable para 195 países do mundo, entre eles EE.UU. con quen mantemos unha relación comercial histórica e mutuamente beneficiosa” engadindo que “se a administración norteamericana quere revisala deberá facelo respectando a autonomía das empresas privadas, a legalidade internacional e os acordos bilaterais entre a UE e EE.UU.”.
O mandatario estadounidense, na súa sempre caótica concepción do mundo, manifestou onte que “España está a ser terrible. Pedín cortar todos os acordos con España”, dixo diante do chanceler alemán Friedrich Merz. Este non respostou á ameaza contra de España, mais si apuntou que os aliados tentan “convencer” a España de que chegue ao 3% ou 3,5% do PIB en gasto militar acordado no seo da OTAN (rexeitado por España).
Para Trump a postura de España de non permitir usar as bases en solo nacional para lanzar a ofensiva contra Irán é “pouco amistosa”, engadindo que “Non ten un gran liderado, é o único aliado da OTAN que non acordou chegar ao 5% e de feito non pagan nen sequera o 2%”.
Se ten dúbidas sobre a pertenza ou non de España á OTAN, Donald Trump ben podería analizar primeiro o papel do seu país nesta organización atlántica, baixo o seu mandado.
