O Concello de Boiro celebrou este xoves unha nova xornada do programa Café co alcalde na parroquia de Bealo, na que participaron arredor de medio cento de veciños e veciñas para trasladar as súas inquedanzas ao goberno local.
O alcalde, José Ramón Romero, acompañado de varios concelleiros, informou das actuacións realizadas recentemente na parroquia e avanzou algúns dos proxectos previstos para os vindeiros meses.
Entre as iniciativas destaca o proxecto de saneamento no lugar de Landeiras, actualmente sen rede, cun investimento estimado de 360.000 euros. A actuación contempla a creación dun sistema de depuración de augas residuais que permitirá reducir o consumo enerxético ao evitar bombeos.
Ademais, o rexedor anunciou o arranxo das unitarias de Ponte Beluso e San Ramón, espazos moi utilizados pola veciñanza, así como a mellora do acceso á aldea de Bealo.
Desde o Concello subliñan que estes encontros, que se estenderán ao resto das parroquias, buscan facilitar o contacto directo coa cidadanía e recoller as súas demandas sen necesidade de desprazarse ata a casa consistorial.
