Os alcaldes dos concellos da Mancomunidade Barbanza Arousa (Ribeira, A Pobra do Caramiñal, Boiro e Rianxo) realizaron na mañá deste martes 31 de marzo unha visita ás obras do futuro Museo do Mar en Cabo de Cruz-Boiro. Segundo informaron María Sampedro (Ribeira), José Carlos Vidal (A Pobra), José Ramón Romero (Boiro) e Julián Bustelo (Rianxo), nestes momentos a Mancomunidade atópase inmersa na fase final da execución dos fondos europeos dos que foi beneficiaria cun 1,5 millóns de euros para o desenvolvemento da actividade turística vencellada á enogastronomía.
Deste xeito, atópanse en execución as obras do Museo do Mar en Rianxo, que actualizará as súas infraestruturas e disporá de aulas enogastronómicas; o futuro Museo da Conserva en Cabo de Cruz-Boiro ou o Museo da Salgadura no Concello de Ribeira, onde xa se remataron os traballos de limpeza arqueolóxica da fábrica de salgadura de Touro para iniciar as obras de musealización da mesma.
Paralelamente, están en licitación outros proxectos incluídos no Plan de Sustentabilidade, como o de Creación dun Club de Produto Enogastronómico no que estarán chamadas a participar tanto as empresas do sector turístico, como conserveiras ou adegas, ou o Plan de Comunicación, ambos en fase de avaliación.
O proxecto de Dotación de vehículos eléctricos en rede e cargadores eléctricos xa se atopa en fase de execución equipando aos catro concellos con estacións para bicicletas eléctricas de uso público.
O vindeiro 30 de xuño será a data na que estean rematados todos estes proxectos que suporán un revulsivo para o desenvolvemento turístico de Barbanza Arousa.
