O Concello de Muros informou neste remate de febreiro que avanzan a “moi bo ritmo” as obras para a renovación integral da rede de abastecemento de auga e o firme nun tramo do núcleo de Louro. “Trátase dunhas obras importantes para o cambio completo da rede de abastecemento coas súas respectivas acometidas, uns traballos que inclúen a substitución das vellas tubaxes de fibrocemento e a adaptación á normativa actual co obxectivo de evitar a perda de auga, mellorando a salubridade e dando máis potencia de caudal”, explicou a concelleira de Obras de Muros, Laura Rivadeneira.
A alcaldesa de Muros, María Lago, supervisou tamén o estado das obras e dixo que “queda a reposición do firme e o cambio da redutora, que vai dar estabilidade ao sistema evitando picos de presión, que son a día de hoxe a principal causa das avarías na zona”.
Estes traballos pendentes realizaranse estes primeiros días de marzo se o tempo o permite, engadiron.
A todo isto sumáronse os labores que as brigadas municipais están a desenvolver nas parroquias en materia de limpeza e mantemento de infraestruturas e redes viarias. Así, proseguiu a limpeza urbana do centro histórico de Muros, poñendo o foco na Pista, rúa Caravel, Ancha e Salero.
Realizáronse tamén labores de limpeza de rozado na rúa do Descanso e no Carme.
“Os baldeos continuarán na vindeira semana nestes espazos públicos”, explicou Laura Rivadeneira, concelleira de Obras de Muros.
A Brigada de Obras do Concello tamén proseguiu cos traballos de reparación de firme na parroquia de Louro, concretamente na estrada de Taxes a Ventín, uns labores que continuarán esta semana.
