A asociación inclusiva Ambar estivo na mañá deste mércores 18 de marzo no Centro de Interpretación dos Castros de Baroña (Porto do Son) celebrando unha xornada sobre recursos e trámites para mellorar a calidade de vida das persoas con diversidades funcionais. O encontro, que deu comezo ás 11:30h, tivo como obxectivo principal achegar ferramentas clave á cidadanía para facilitar o acceso a servizos esenciais e, en última instancia, promover unha mellora na súa calidade de vida.
Durante a sesión, as persoas asistentes puideron afondar no coñecemento de diversos procedementos administrativos e recursos dispoñíbeis que con frecuencia resultan complexos de xestionar. A xornada non só funcionou como unha sesión informativa, senón tamén como un espazo de diálogo onde se compartiron experiencias e se resolveron inquedanzas de xeito directo. A encargada de informar e resolver as dúbidas foi Raquel Lojo, traballadora social da Asociación Ambar.
Esta xornada enmárcase dentro dun conxunto de xornadas que se levará a cabo en varios concellos da contorna. Realízase grazas ao financiamento da Xunta de Galicia (Consellería de Política Social e Igualdade), con co-financiamento de fondos europeos.
