Unha persoa foi atopada sen vida na mañá deste domingo nunha piscina situada no lugar de Abalo, no municipio pontevedrés de Catoira.
Segundo informou o 112 Galicia, o aviso recibiuse uns minutos antes das 11:30 horas, cando un particular alertou da presenza dunha muller que podería estar falecida no interior dunha piscina.
De inmediato, os xestores do Centro Integrado de Atención ás Emerxencias mobilizaron aos Bombeiros de Vilagarcía de Arousa, ao Grupo de Emerxencias Supramunicipal (GES) de Padrón, á Garda Civil e á Agrupación de Voluntarios de Protección Civil de Catoira.
Ata o lugar tamén se desprazou unha dotación do Servizo de Urxencias Sanitarias de Galicia-061, que foi informada do suceso polo 112. Porén, nada se puido facer por salvar a vida da persoa, confirmándose o seu falecemento no lugar dos feitos. As circunstancias do ocorrido están a ser investigadas.
