A delegada da Xunta da Coruña, Belén do Campo, supervisou este martes 31 de marzo, xunto ao alcalde de Outes, Francisco Calo, as instalacións da Piscina Municipal para comprobar o resultado das actuacións financiadas coa colaboración da Xunta. Durante a visita, a representante do Goberno autonómico destacou que “esta intervención contou cun investimento de máis de 70.000 euros, dos cales máis de 63.000 euros foron achegados pola Xunta de Galicia, o que supón arredor do 90 % do custo total”. Engadiu que esta actuación foi posíbel grazas a un convenio que tivo por obxecto fixar as liñas de colaboración entre a Consellería de Presidencia, Xustiza e Deportes e o Concello de Outes permitindo renovar e modernizar diferentes elementos do complexo deportivo.
A delegada comprobou que as melloras executadas incluíron un novo equipamento para o ximnasio municipal, coa incorporación de máquinas de cardio e musculación que substitúen ás existentes, xa deterioradas polo paso do tempo, así como a instalación dun autómata para a xestión da maquinaria da piscina, que permitirá un control máis eficiente de parámetros como a temperatura da auga e do aire ou o funcionamento das válvulas e sistemas auxiliares, mellorando o rendemento enerxético e o mantemento das instalacións.
Ademais, incorporouse unha cadeira elevadora no vaso da piscina, “unha actuación fundamental para garantir a accesibilidade das persoas con mobilidade reducida e facilitar o uso por parte de colectivos como os usuarios do Centro de Día de Outes”, explicou, lembrando que o ximnasio municipal de Outes, aberto desde maio de 2007, presta servizo de luns a sábado durante todo o ano, agás o mes de agosto destinado ao seu mantemento, e forma parte dun complexo deportivo que integra distintas salas de actividades, zona de mantemento, espazo de ximnasio e a propia piscina, rexistrando unha media diaria de arredor de 300 usuarios.
Así mesmo, estas instalacións son empregadas por centros educativos como o CEIP e o IES Francisco Añón de Outes, ademais de contar con convenios con diversas entidades deportivas e sociais, entre elas un equipo de tríatlon e o centro de día, o que pon de manifesto o seu papel como espazo de referencia para a práctica deportiva, a educación e a inclusión social no municipio.
A delegada territorial destacou a adhesión do Concello de Outes ao programa Adestra a túa Saúde, unha iniciativa destinada a mellorar o benestar dos maiores, promovendo a actividade física axustada a cada persoa e facilitando o seu seguimento por médicos e especialistas.
