A directora xeral de Desenvolvemento Pesqueiro, Ángeles V. Suárez, participou este sábado na xornada de clausura da segunda edición da iniciativa gastronómica Da Pobra a Portosín, Tapeando polo Mar, que se consolida como unha proposta de referencia para a promoción dos produtos do mar galegos.
O evento puxo o broche final a tres sábados consecutivos de actividade nos que os establecementos hostaleiros da Pobra do Caramiñal, Porto do Son e, nesta última xornada, os de Ribeira, ofreceron ao público unha ampla variedade de tapas elaboradas con produtos pesqueiros como o mexillón, o atún e a anchoa.
Durante a súa visita, Ángeles V. Suárez destacou a boa acollida da iniciativa tanto por parte do sector hostaleiro como da cidadanía, subliñando a importancia deste tipo de accións para impulsar o consumo de produtos do mar e apoiar ao mesmo tempo a economía local.
A Xunta colaborou un ano máis con este evento no marco da súa aposta pola promoción e posta en valor dos produtos pesqueiros de Galicia, contribuíndo ademais a dinamizar a actividade hostaleira e o turismo nas vilas costeiras participantes.
