A conselleira do Mar, Marta Villaverde, mantivo hoxe unha reunión con representantes da Federación Galega de Confrarías de Pescadores e coas federacións provinciais para analizar a situación do marisqueo tras os temporais rexistrados nos últimos meses. No encontro tamén se abordou o grao de execución da campaña extraordinaria de análises do estado do recurso nos bancos marisqueiros das rías galegas, da que xa se realizaron máis do 90 % das mostraxes programadas.
Na reunión participou tamén a directora xeral de Desenvolvemento Pesqueiro, Ángeles V. Suárez. Durante o encontro, a responsable autonómica explicou que os traballos xa finalizaron nas rías de Vigo, Pontevedra, Muros-Noia, Corcubión, A Coruña e Ferrol, así como na Costa da Morte.
No caso da ría de Arousa —onde se concentrou o maior número de mostraxes— o grao de execución sitúase arredor do 82 %. A previsión é completar as últimas análises nos vindeiros días, sempre que as condicións das mareas o permitan.
Villaverde destacou a capacidade de traballo e a profesionalidade dos biólogos de zona da Consellería do Mar e das asistencias técnicas das confrarías que participan na realización destas mostraxes. Segundo indicou, este labor conxunto está a permitir recompilar os datos necesarios para elaborar unha avaliación científica completa da situación de cada zona produtiva.
A información recollida xa está a ser analizada polos equipos técnicos, que continúan recibindo e procesando datos sobre o estado dos bancos remitidos polas asistencias técnicas das confrarías. Os primeiros resultados desta avaliación poderían coñecerse nos vindeiros días.
A reunión serviu tamén para recoller as impresións e a información achegada polas propias confrarías sobre a evolución dos bancos marisqueiros e a situación dos profesionais do sector. Neste contexto, a Xunta reiterou o seu compromiso de continuar traballando da man do sector no deseño de medidas que permitan apoiar aos profesionais e garantir a sustentabilidade do marisqueo galego mentres se recuperan os recursos.
