O Centro Social de Abanqueiro (Boiro) acolle este venres 13 de marzo a función Vaites, rapariga!, de Tarabela Creativa. O espectáculo, unha función para público adulto, dará comezo ás 21.00 horas. As entradas estarán dispoñíbeis para o público dende unha hora antes da función.
Sinopse
Non é preciso darlle moitas voltas: Vaites, rapariga! é un western. Deses do Salvaxe Oeste. Salvaxe, pero non lonxano, ollo. Porque Carmen Lingua Afiada Conde e Su Garrido Guitarra Lenta Pombo únense para traernos as historias e as melodías do noso Noroeste. Onde as paisaxes galegas, as súas personaxes, o seu xeito de buscarse a vida, de enfrontarse aos conflitos e de explorar novas posibilidades teñen un “aquel” coas pelis de vaqueiros. Unha contada ao galope entre o Salvaxe Oeste americano e o Feroz Noroeste galego. Con toques de humor negro, surrealismo, emotividade e certo aire explosivo.
Tres historias: unha heroína que lidera a resistencia dos nativos chairegos. Un home delirante que marcha do Canón do Sil ao Canón do Colorado. O foraxido con máis chiripa de toda a costa oeste, de corazón grande e mans pequenas, que “a caga” xusto no último momento. Todo aderezado pola banda sonora a base de voz, pandeireta, sacho, guitarra ou loop.
Ficha técnica
Autoría: Carmen Conde
Narración oral: Carmen Conde
Composición: Su Garrido Pombo
Música ao vivo: Su Garrido Pombo
Iluminación: Diego Gallego
Son: Ezequiel Orol
Escenografía: Bieito Inc. e Pía Piadosa
Produción: Tarabela Creativa
Distribución: Tarabela Creativa
