A Deputación da Coruña participa esta fin de semana na feira turística barcelonesa B-Travel
Baixo o título ‘Historia da conserva na provincia da Coruña’, a presentación da institución provincial afondou na tradición conserveira da provincia, especialmente en territorios como o xeodestino Barbanza Arousa.
A Deputación da Coruña participa esta fin de semana na feira turística B-Travel, que se celebra na cidade de Barcelona do 20 ao 22 de marzo, levando como principal aposta o turismo industrial ligado á identidade galega.
Baixo o título ‘Historia da conserva na provincia da Coruña’, a institución provincial presentou no espazo B-Industrial unha proposta centrada na posta en valor do patrimonio conserveiro, con especial protagonismo do Barbanza Arousa, un territorio onde esta actividade marcou profundamente a economía, a paisaxe e a cultura.
O vicepresidente e deputado de Turismo, Xosé Regueira, destacou que o obxectivo é “fortalecer os sectores produtivos” e crear experiencias turísticas auténticas baseadas na identidade galega. Neste sentido, puxo en valor o papel do rural como “espazo estratéxico” capaz de ofrecer vivencias de calidade sen perder a súa esencia.
A proposta inclúe tamén o proxecto dun centro de interpretación da conserva en Barbanza Arousa, co que se pretende divulgar a historia e evolución dun sector clave no litoral galego. Regueira lembrou que esta industria ten raíces históricas ligadas á chegada de empresarios cataláns, así como de maragatos e portugueses, que contribuíron á súa expansión.
Ademais, a iniciativa destaca a calidade dos produtos do mar, tanto frescos como en conserva, e a súa relación coa gastronomía local, incluíndo a maridaxe cos viños da Indicación Xeográfica Protexida Terras do Barbanza e Iria.
“Buscamos na gastronomía o primeiro reclamo para visitar Galicia, pero tamén falar da industria e da súa conexión co territorio”, explicou Regueira, quen subliñou a importancia de apostar por un turismo sostible, baseado na autenticidade e na excelencia.
Con esta participación, a Deputación da Coruña reforza a súa estratexia de promoción turística, apostando polo turismo industrial e gastronómico como piares para posicionar a provincia como un destino singular e diferenciado.
