A sala de exposicións da Casa Mariñeira acolle desde hoxe a cuarta edición da Mostra da Camelia, unha cita que pon en valor a beleza e diversidade desta flor emblemática en Galicia.
A exposición poderá visitarse durante toda a fin de semana en horario de 10:00 a 14:00 e de 17:00 a 19:30 horas, converténdose nun atractivo cultural e turístico para a veciñanza e visitantes.
A iniciativa naceu da man da Concellería de Turismo e do impulso de dous afeccionados ao cultivo da camelia, José Ramón Teixeira e Marisol Cameán, que promoveron tanto a organización da mostra como a implicación da veciñanza.
Nesta edición participan máis de 15 persoas colaboradoras, que achegan exemplares procedentes de A Pobra do Caramiñal e doutros concellos da contorna como Boiro e Rianxo. O obxectivo é amosar a riqueza e variedade das camelias presentes na zona.
A mostra complétase coa participación de 30 alumnos e alumnas do CEIP Pilar Maestú Sierra, que expoñen unha colección de fotografías centradas nesta flor.
Ademais, o evento inclúe un posto de venda de doces elaborados con aceite de camelia, engadindo un atractivo gastronómico a esta proposta que combina natureza, cultura e participación veciñal.
