A Asociación Francisco Lorenzo Mariño de Aguiño comunica que con motivo da programación Abril, mes dos libros organiza unha presentación literaria dunha novela curta, titulada A Forcadiña da autora ribeirense Carmen González, e que terá lugar no salón de actos da Casa do Mar de Aguiño o venres 10 de abril ás 20 h, con entrada libre e de balde para calquera persoa interesada.
O acto estará presentado por Unai González Suárez como vicepresidente da asociación FLM e xestor cultural do Concello de Ribeira; acompañará á autora, Carmen González, o profesor de literatura de ensino medio e escritor, Xabier López Marqués.
No acto tamén se poderá adquirir a novela que asinará a autora ao finalizar o mesmo, a calquera persoa que o desexe, o prezo é de 17€.
Deste xeito, a asociación segue a organizar actividades para a oferta cultural no pobo de Aguiño en particular e en Ribeira e na contorna en xeral, abertas non só a socias e veciños, senón a toda a cidadanía.
E engaden: “Tamén estamos a preparar un espectáculo de música tradicional orixinal para o este mes de abril que terá lugar no Auditorio Municipal de Ribeira en colaboración coa asociación cultural Bailadela e a concellería de Cultura de Ribeira, pero do que desvelaremos detalles máis adiante”.
Do mesmo xeito, traballa na celebración do Maio Cultural de Aguiño, o propio día das Letras Galegas, domingo 17 de maio no porto de Aguiño, e da IX edición do Festival de Canto e Música tTadicional Son´s en Aguiño que terá lugar no mes de xuño tamén en Aguiño.
