María Eugenia Reiriz, artista do Obradoiro de Arte de Ambar, asociación inclusiva do Barbanza de persoas con diversidades funcionais, vai expor a súa obra recente na III Mostra de Mulleres Creadoras do Concello de Ribeira, que está programada para este xoves, 5 de marzo, no Centro Cultural Lustres Rivas con sede en Santa Uxía.
A proposta artística de Reiriz nace dunha profunda admiración polas figuras icónicas do panorama musical. O seu proceso creativo céntrase en retratar ós seus artistas favoritos, un abano ecléctico e potente que viaxa dende a elegancia internacional de Celine Dion ata o temperamento de Lola Flores.
Nesta edición, os asistentes poderán contemplar unha peza moi especial: o retrato de Rocío Jurado. Segundo informa Ambar, “a obra non é só visual, senón que vén acompañada dunha dimensión literaria”, e, de feito, María Eugenia quixo completar a homenaxe dedicándolle un poema de autoría propia á artista. “Marchou moi cedo, a máis grande”, reza un dos versos que os visitantes poderán ler xunto á imaxe da cantante, nun exercicio de memoria e respecto cara ao legado da artista.
A inauguración oficial contará ca presenza da autora e servirá como punto de encontro para poñer en valor o talento feminino local.
Evento: Inauguración da obra de María Eugenia Reiriz (III Mostra de Mulleres Creadoras).
Data: Xoves, 5 de marzo de 2026.
Lugar: Centro Cultural Lustres Rivas, Ribeira.
Hora: 20:30 h.
