Pedro Sánchez, presidente do Goberno de España desde xuño de 2018 após unha moción de censura contra Mariano Rajoy, é o autor dun libro titulado “Manual de resistencia” que moitos dos seus lectores cualifican de “interesante” e “esclarecedor, auténtico, ameno e sen mentiras nen rencores”.
Nada podo engadir nen quitar ao publicado pola editorial, por canto, sinxelamente, non o lin. Pero o título da obra veume á memoria cando sopesaba os “pros” e os “contras” dos seus mandados como primeiro ministro ou presidente de España nun momento e circunstancias nada doadas para o exercicio da función para a que foi elixido, primeiro por maioría dos electores e, en segunda ocasión, cos apoios dos grupos minoritarios do Parlamento, xa que logo, a maioría minoritaria correspondíulle ao PP, que non foi quen de conformar unha maioría de goberno, cousa que si fixo o PSOE, partido que, malia todo, está a executar un segundo mandado moi problemático no que nen sequera ten a posibilidade de aprobar os orzamentos anuais.
A esta situación súmase outra circunstancia: a celebración de eleccións nas comunidades autónomas de Extremadura e Aragón outorgaron un resultado negativo para as candidaturas socialistas e deixan a porta aberta a un PP que, en teoría, pode acceder a formar goberno en coalición con Vox (cuestión tamén problemática).
Pois con todo isto semella que Pedro Sánchez dispón da agulla de marear do seu “manual de resistencia” porque nunca en democracia -tampouco na ditadura franquista- ningún goberno español se viu na necesidade de superar circunstancias tan adversas como as acaecidas na España de Pedro Sánchez como xefe do Executivo español: a pandemia de COVID, o volcán da illa da Palma, a “dana” de Valencia e a cadea de vendavais que arrasan o territorio español e obriga ao sector pesqueiro a un amarre de dous meses que levan a mariñeiros, gandeiros e labregos a protestas xustificadas que, malia todo, non foron dabondo para obrigar a Sánchez a renunciar ao seu posto na Moncloa.
É o seu manual de resistencia, a súa sorte, o seu saber facer?… Que é?. Porque, malia os atrancos citados e unha oposición que non o da batido nun tempo que semella ser propicio para o labor de zapa que levan a cabo o PP, Vox e Junts (especialmente) coa colaboración de Podemos, Pedro Sánchez segue avante e sitúa a España en parámetros verdadeiramente sorprendentes.
Haberá que ler o manual.
