O Concello de Ribeira vén de publicar a licitación do Servizo profesional de asesoramento xurídico en materia de estranxeiría e asilo, cun orzamento base de 11.011 euros. O contrato terá unha duración dun ano, desde abril de 2026 até abril de 2027, ambos incluídos, e estará orientado a reforzar a atención que o Departamento de Servizos Sociais presta ás persoas migrantes do municipio.
O obxecto desta contratación é garantir un asesoramento xurídico especializado en materia de estranxeiría e asilo, co fin de complementar a atención social que xa se ofrece desde o Concello. O servizo facilitará información, orientación e acompañamento nos complexos procesos administrativos vinculados ao dereito de estranxeiría e á protección internacional, co propósito de evitar erros na tramitación e mellorar as posibilidades de éxito das solicitudes.
Segundo sinalou a alcaldesa, “estamos a falar dun servizo especializado que vai facilitar a inclusión de todas as persoas migrantes que residen no noso municipio, con especial atención a aquelas que se atopan en situación de risco ou exclusión social”.
Obxectivos do servizo
O obxectivo xeral da iniciativa é favorecer a inclusión social e laboral da poboación migrante residente en Ribeira, proporcionando información e asesoramento personalizado en materia de estranxeiría e facilitando a tramitación administrativa de expedientes, como os relativos ao asilo e á protección internacional.
Ademais, o servizo ofrecerá apoio ao persoal técnico municipal, ás entidades sociais e ás empresas interesadas na contratación de persoas en situación administrativa irregular, promovendo así a súa inserción laboral e a regularización da súa situación.
A alcaldesa destacou que “con esta licitación Ribeira reafirma o seu compromiso coa integración, a igualdade de oportunidades e o acompañamento profesional ás persoas migrantes, promovendo unha sociedade máis inclusiva e cohesionada”.
