O pleno de Ribeira celebrado esta semana ratificou por unanimidade a solicitude de financiamento para a nova edición do Obradoiro de Emprego Tahume, a edición XI, que será impulsada novamente polo Concello de Ribeira e máis polo de Porto do Son, achegando formación e inserción a unha vintena de habitantes de ambos os municipios.
A alcaldesa ribeirá, María Sampedro, informou que as modalidades elixidas para o programa deste ano son as de traballos de carpintería e móbel e a de actividades auxiliares en conservación e mellora de montes.
Sampedro explicou que se trata dunha iniciativa consolidada que colleitou importantes éxitos nas súas anteriores convocatorias e que pon o foco en “especialidades moi demandadas polo mercado laboral”, orientándose a mellorar a empregabilidade das persoas participantes.
Ademais, a proposta inclúe a solicitude de incentivos á contratación por parte das empresas unha vez rematado o obradoiro.
A anterior edición do obradoiro, a X, rematou en verán do ano pasado cun investimento de 423.000 € euros ademais dos gastos en material asumidos polas Administracións Locais.
Este obradoiro laboral é un programa mixto de formación e emprego dirixido a mellorar a ocupabilidade e empregabilidade das persoas que actualmente están paradas, e que está subvencionado pola Consellería de Promoción do Emprego e Igualdade, con dez alumnos de cada unha desas localidades. Ademais, como incentivo, a Xunta de Galicia ten realizado unha achega 30.000 euros para fomentar a empresas que contraten a persoas formadas neste obradoiro.
Ademais da formación específica de carpintería e forestal, o alumnado recibe formación en competencias dixitais, igualdade, medio ambiente, orientación laboral ou autoemprego, entre outras. Por outro lado, o alumnado participante que non estea en posesión da Educación Secundaria Obrigatoria (ESO) recibe formación específica para a súa preparación e obtención.
