O Auditorio de Rianxo acolle este sábado 7 de febreiro o espectáculo familiar O arcón de Noa, de Amarelo Producións. Será ás 19.00 horas na Sala Arcos Moldes. Trátase dunha cita familiar, un espectáculo de danza e fantasía, para crianzas de a partir de 2 anos. A entrada será de balde até completar a capacidade. Os convites poderán retirarse dende unha hora antes do comezo da función (máximo de 2 persoas).
Trátase dunha proposta ao abeiro da Rede Cultural da Deputación da Coruña.
Sinopse
Noa é unha nena que vive coa súa nai nunha casa apartada, e non ten con quen xogar. No seu arcón garda os xoguetes que xa non a entreteñen. Todo parece vello e apagado no seu mundo solitario.
Pero un día, sen decatarse, activa un encantamento e entra no mundo máxico que habita no arcón, onde os xoguetes cobran vida e un ser misterioso goberna sobre eles.
A través da linguaxe da danza contemporánea, a utilización de obxectos e a interacción co dispositivo escénico, o espectáculo mostra múltiples situacións e personaxes guiados por unha narración clásica de conto de maxia e fantasía.
