O proxecto Renatur_Outes quere seguir avanzando na mellora e na conservación do río Tins, e ten o obxectivo de facelo coa máxima participación da veciñanza. Por iso as entidades impulsoras do proxecto lanzaron unha enquisa para que dean opinións e suxestións as persoas que visitaron o río Tins e a súa contorna ao longo do último ano. “Estamos a recoller percepcións da xente que coñece o río para seguir mellorando o proxecto de renaturalización”, explican, engadindo que a enquisa é para persoas maiores de 18 anos, é voluntaria e totalmente anónima.
Quen precise máis información sobre o proxecto tena na web renatur.outes.gal.
Liderado polo Concello de Outes, o proxecto Renatur_Outes conta coa participación de investigadores das tres universidades públicas galegas, a Fundación Montescola e o CEER (Centro de Estudos Eurorrexionais Galicia- Norte de Portugal) e o apoio da Fundación Biodiversidad do Ministerio para la Transición Ecológica y el Reto Demográfico (MITECO) no marco do Plan de Recuperación, Transformación e Resiliencia (PRTR), financiado pola Unión Europea – NextGenerationEU.
No eixo do proxecto están a recuperación do bosque de ribeira, o control de especies exóticas invasoras, como as distintas especies de acacia presentes (Acacia dealbata e Acacia melanoxylon), a Tradescantia fluminensis ou as plantas do xénero Crocosmia, a limpeza de residuos da contorna fluvial, e a sensibilización ambiental mediante accións de voluntariado, formativas e divulgativas, fomentando a participación pública da cidadanía de Outes mediante sesións de gobernanza cidadá ao longo de toda a vida do proxecto. Desde xeito non só se pretende alcanzar unha recuperación e mellora da biodiversidade, mais xerar un compromiso social máis alá da propia vida do proxecto.
