Arredor de 200 veciños e veciñas participaron na tarde-noite de onte no xa tradicional Cocido e Baile de Entroido organizado polo Club de Xubilados de Lousame no local social que a entidade ten en Aldeagrande.
A gran maioría das persoas asistentes acudiron disfrazadas e con moitas gañas de festa nunha celebración que deu comezo cun xantar a base de cocido tradicional, composto por lacón, chourizo, costela, orella e grelos. O ambiente festivo e de confraternidade marcou unha xornada moi especial para as persoas maiores do municipio.
O alcalde de Lousame, Esteban Ares García, xunto coa concelleira de Cultura, Silvia Agrafojo, e o concelleiro de Obras, Ramón Martínez, agradeceron o convite realizado pola asociación e puxeron en valor o traballo da súa xunta directiva á hora de promover actividades que fomentan o lecer e a participación activa das persoas maiores.
Tras o xantar, as persoas presentes desfrutaron dunha ampla sobremesa con doces típicos do Entroido, como orellas e filloas, antes de dar paso ao baile. A música do grupo Aires de Broña animou a pista e moitas das persoas asistentes non dubidaron en botar unhas pezas, nun ambiente cheo de ledicia.
A xornada completouse co tradicional sorteo de cestas de agasallo, conseguidas pola xunta directiva do Club de Xubilados de Lousame, poñendo o broche final a unha celebración que, un ano máis, volveu ser todo un éxito de participación e convivencia.
