Este luns 16 de febreiro celebrouse no local da Asociación de Empresarios de Ribeira o sorteo da campaña local de San Valentín, organizada pola patronal e desenvolvida, segundo indicou a AER, “cun balance moi positivo en termos de participación e impacto no comercio local”.
Nesta edición rexistráronse un total de 3.053 tíckets de compra, o que supón un incremento do 28 % con respecto ao ano anterior. “Estes datos confirman a boa acollida da campaña entre a clientela e o crecente compromiso co comercio e a hostalería de proximidade”, engadiu a AER.
Nesta campaña sorteáronse dúas ceas, que as persoas agraciadas poderán desfrutar en calquera dos establecementos asociados do sector da restauración. As compras premiadas realizáronse nos establecementos Zapatería Chaira e Floristerrae, aos que a asociación empresarial trasladoulles tamén o recoñecemento pola súa participación.
A asociación tamén quixo expresar “un agradecemento especial” a todos os clientes que escolleron consumir en Ribeira e apoiar o pequeno comercio, demostrando unha vez máis a súa confianza nos negocios locais. “O seu apoio é fundamental para fortalecer o tecido comercial e hostaleiro do municipio e continuar impulsando iniciativas que dinamicen a nosa vila”, engadiu a patronal.
Esta actividade está co-financiada pola Xunta de Galicia, Comercio Galego.
