O Entroido xa está a percorrer Galicia, e Amicos xa leva semanas preparándose para celebrar unha das festas máis divertidas do ano. Uns preparativos que a mañá deste xoves, 12 de febreiro materializáronse no Gran Festival do Entroido da entidade inclusiva do Barbanza, nunha mañá na que a chuvia reuniu a todo o grupo nos corredores do Centro de Atención Integral.
A temática deste ano xirou en torno ás comunidades do mundo, polo que se intentou representar a estética de algúns dos moitos grupos socioculturais que conviven no planeta. Un tema no que participantes e técnicas levan traballaron nas últimas dúas semanas.
Así, as/os encargadas/os de abrir o desfile ao ritmo da música foron o grupo dos viquingos da Fábrica Social, aos que seguiron as geishas de ExpresArte. A continuación foi a quenda dos comanches de Tecnoloxía, tralos que desfilaron o grupo dos esquimós da sección de Peques.
Durante a segunda metade do desfile, pasearon polo corredor os masais de Formación, os aztecas do obradoiro UAP2 e os zulús da Fábrica Social.
Ao remate do desfile, o xurado foi o encargado de decidir os grupos que sobresaíron en cada categoría do concurso de disfraces. O tribunal estivo formado por Cándido Dieste e Artemia Carlés, familiares de dúas persoas que acoden á entidade; Lucía García, alumna en prácticas do AFD de Atención Sociosanitaria; e Laura Manzano, alumna-traballadora da formación dual Oficina de validación cognitiva.
Despois dunha intensa deliberación, o xurado entregou os diplomas aos grupos das distintas categorías:
Mellor disfrace: Esquimós
Mellor caracterización: Viquingos
Mellor maquillaxe: Aztecas
Mellor coreografía: Comanches
Mellor posta en escena: Zulús
Os máis simpáticos: Geishas
Mellor comparsa: Masais
Tralo concurso, os amicos e amicas desfrutaron xuntos dun día cheo de música, doces típicos, baile e moita diversión.
Ademais da celebración deste xoves, os cativos e cativas da área de Peques festexarán un pequeno entroido libre no centro de Amicos en Oleiros. Alí desfrutarán dunha mañá chea de música, baile, diversión e unha merenda conxunta.
