O Concello de Rois celebrará o vindeiro venres 6 de marzo o acto central da programación con motivo do Día Internacional da Muller (8M), cunha cita institucional que terá lugar ás 17.30 horas no Auditorio Municipal.
O evento estará presidido pola entrega do III Premio 8M do Concello de Rois a Pilar Freire Esparís, profesora do departamento de Historia Económica da Facultade de Ciencias Económicas e Empresariais da USC. Este recoñecemento distingue a traxectoria, o compromiso e a contribución de mulleres referentes no municipio.
A programación do acto estrutúrase en cinco bloques diferenciados. En primeiro lugar, procederase á lectura da Declaración Institucional do 8 de Marzo, reafirmando o compromiso do Concello de Rois coa igualdade real e efectiva entre mulleres e homes.
Posteriormente terá lugar a entrega do III Premio 8M a Pilar Freire Esparís, seguida da entrega de premios do Concurso Escolar de Carteis do Día da Muller, unha iniciativa que busca implicar á comunidade educativa na reflexión e sensibilización arredor da igualdade.
A xornada continuará coa proxección do documental Maruja Mallo, mitad ángel, mitad marisco, dedicado á figura da artista galega que é unha das creadoras máis singulares da xeración do 27, cuxa obra e traxectoria simbolizan a ruptura de barreiras e a reivindicación do papel das mulleres na cultura.
O acto pecharase cunha charla-coloquio dinamizada por Antón Reixa, que convidará ao público a participar nun espazo de reflexión colectiva arredor da igualdade, a cultura e a memoria das mulleres.
Con esta programación, o Concello de Rois consolida o 8 de Marzo como unha data de encontro, recoñecemento e reflexión colectiva, combinando o ámbito institucional, educativo e cultural nun mesmo espazo.
